Mit da Zeit hobn si in da automatischen Statistik a poa Föla eingschlichn. Hiazt hob is amoi uandlich duachputzt. Es suit hiazt wida ois passn.
Wedastatistik
Eigenoartiga heiriga Temperaturvalauf
Nuamalerweis mocht bei ins di Temperaturkurvn ibas Joah gsegn hibsch an Bugl. Heia oba iss recht floch. Wånn ma hiazt amoi vo da kurzn Hitz im Juni åsegn, dånn iss vo Miaz bis in Oktoba eini net recht vü untaschiedlich gwen. Schau da des untn å bei da Temperaturgrafik vo Jänna bis 13. Oktoba! Wie kummt des? Des kummt vo dem, dass zeascht im Fruahjoah vül z’woam woa, dann im Juli und bsundas im August z’koid, und hiaz im Oktoba iss wida z’woam.
Easchta Bodnfrost
Heit hot’s in easchtn Reif gebn in da Buckladn Wöd. Do und duat hot ma’s auf da Wisn und auf de Dachln scho weiß gsegn. Bei da Ö3 Wedastation is ois Bodnminimum -0,4 Grad gmessn woan.
Launenhoft – des woa 2013
Des unbeständige an insan Weda is gånz normal, oba so vo aan extrem ins åndare wia im vergånganan Joah 2013 gehts a söltn. Insgesamt hots mit 957,8 mm a bissl mehr Nidaschlog gebm ois in de Jåhre davua. Ålle Details findt ma auf meina Statistikseitn do.
Vo an Extrem ins ondare
Am 8. August 2013 is fia de Ö3-Wedastation Krumboch in da Buckladn Wöd mit 36,0 Grad a neicha Temparaturrekoad aufgstöd worn (gmessn wiad do seid 2006). Davua is in da Messperiodn 1986 bis 2006 an da “Priv. Klimastation Krumboch” a Rekoad vo 35,3 Grad gmessn worn (jeweus am 13.8.2003 und am 20.8.1992).
Bis in Aprü eini hobn ma davua jo a ziemliche Köldn ghobt. Und a bein Regn woa heia scho ois dabei zwischen gonz vü und vü zweng.