 |
Weda letzte Wochn |
Tornadobuach
Des Buach „Tornado – Spur ins Heute“, wos i gemeinsam mit de Autoren Bodo Hell und Peter Gruber gschribn hob, is hiaz aussa kumma. Bestöln kå mas do beim ESSL.
Wedan bringan Segn und Tod
Da Regn is jo gånz wichtig im Fruahjoah und Summa, und den bringan do hoid oft de Wedan. Oba es kån a schnö gferlich wean – ned nur duach zfü Wossa, a duach de Blitz. Ban Seppn in Bodn (Gmoa Thomasberg) hob i dazua des Åndenkn-Büdl do gfundn:
Wer kennt no so a Åndenkn-Büdl noch an Weda-Unglick in insra Gegnd?
Ratschn 2018 in Grumboch
In de Koartog san wida de Ratschnkinda unterwegs. Im Moakt und bei da Kirchn ersetzn de Ratschn jo de Kirchnglockn zu de Gebetszeitn um 6, 12 und 20 Uhr. Außerdem wiad mit de Ratschn stott de Glockn a zu de Gottedienste gruafn. Den genauen Plan mit olle Sprichal gibbs do: PDF
(c) ZAMG
Neicha Imagefüm fia Grumboch
In de vagånganen Wochn hob i de Texte fia den neichn Imagefüm vo Grumboch entwuafn. Und hiaz woar i mitn Team vo Eventfever (de mochn des Video) im Tonstudio und hob duat de Tonaufnåhmen gmocht. I bin scho g’spånnt, wiar’a eich gfoin wiad, da Füm. In a poa Wochn suit a fertig sei.
A Foto vo de Tonaufnåhmen gibbs do.
Erdbeben
Um 17:41 is in Grumboch am 10. Novemba a Erdbebn zan spian gwesn. Des Epizentrum woar weiter westlich. Mehr dazua gibbs do.
Des Seismogramm vo da ZAMG:
Und des Epizentrum bei Neunkirchen:
Wer’s gschpiat hot sui bitte a Möldung mochn: ZAMG Erdbeben-Möldeformular
Ausschreibung Literaturwettbewerb Tornado 100+1
Wer si fias Weda interessiert und si gern mit Sproch spült suit si do boid möldn: ban Literaturwettbewerb Tornado 100+1.
Do gehts drum si mitn Tornado vo Neistodt 1916 ausanånda z’setzn. Solång a Text dabei vuakummt is des Medium wurscht: kon oisa a ra Youtube Video sein, nur ois Beispü. Mehr dazu gibbs do:
Schula diafn do genau so mitmochn wia Erwochsane.
Maibambrauch oid und nei
I hob ma de Oawad åndå und aussagsuacht, wie des mit de oidn und neichn Maibam-Bräuch in Grumboch so is. Den neichn Brauch kennt ma eh, iban oidn Brauch vo Grumboch find’t ma z. B. wos im „Volkskundeatlas“, der in de 50er Joah von vurign Joahrhundert aussa brocht woarn is:
Do gibbs an kompaktn Vagleich vo nei und oid ois PDF zan owaziagn (klick!) auf Hochdeitsch.
Da Winta im Fruahjoah friachaszeitn
12.4.1994 Schnee
15.4.1973 vü Schnee zur Poimweih
17.4.1955 („Weißer Sundog“) Sturm mit iba an hoibn Meter Schnee, am 19. und 22. no amoi Schnee
Ånfang Aprü 1900 3 Tog lang gewoitiger Schneesturm
12.5.1897 Schnee bei da Obstblia, nochher Frost
27.3.1853 (Ostersundog) suiche Schneemassn, dass de Gwahn so hoch woarn wia de Kirchhofmauer. A Frau aus Stråß is ban hamgeh vo da Kirchn in de Gwahn steckn blibn und dafroan.
4.5.1608 vü Schnee
7.-8.6.1420 vü Schnee und Frost
Wånn ma genau aufs Datum schaut hoaßt des, ma muaß iwaschlogn so olle 50 Joahr circa so spot no mit so an gewoitign Schneesturm rechnan.
Ratschn im Moakt in Grumboch
Noch längara Zeit probia ma heia wida amoi des vulle Programm mit de Ratschnkinder in de Koartoge. Oiso imma wånn sinst de Glockn leitn tatn, wia ebba vua da Mess zan hoiba oda zan zsammleitn, oda a zan Gebetsleitn um sexe in da Frua oda z’Mittog, imma dånn san de Ratschnkinda a um de Kirchn oda im Moakt unterwegs mit de oitn und bewährtn Sprichal.
De woss genaua interessiert: den Ratschn-Plan gibbs do.
So leiwand
A desmoi woar des Jodel-Schitouren-Wochnend mit de Härtels auf da Tauplitz wieda a rechte Hetz!
Nebn mia vorm „Sturzhahn“-Gipfl da beste Jodel-Lehrer vo da Wöd: Hermann Härtel (Foto: (c) Ingeborg Magdalena Härtel)
Wer an Jodler lernen mog, sui mi hoid drauf ånredn oda si sölba fia an Kurs ånmöldn!